PC tölvan á afmæli í dag.

Ég man þegar ég sá bíómynd með Rosanne Barr fyrir mörgum árum síðan. Þar var mikið talað um PC-samhæfða. Mig minnir að fyrsta PC tölvan sem ég komst í kynni við hafi verið heima hjá Arnóri, Jóhanni eða jafnvel í kjallaranum hjá Gosa.

A.m.k. man ég að tölvan hjá Arnóri var Hyundai með svarthvítum skjá og magnaðri útgáfu af DOS sem hafði allskonar stórmerkilega eiginleika, þetta var ekki MS-DOS til að byrja með, heldur eitthvað annað magnað DOS.

Tölvan hjá Jóhanni var afar hávær og var með gulum skjá. Jóhann átti stærsta tölvuleik sögunar á þeim tíma; King's Quest IV.

En báðar þessar tölvur voru mest notaðir undir Hero's Quest sem ég spila ennþá reglulega.

Í kjallaranum hjá Gosa voru ábyggilega tvær eða þrjár ljótar og leiðinlegar Hyundai tölvur með gulum skjáum. Man ekki eftir því að við höfum mikið spilað leiki í þeim, en við lékum okkur mikið að skrifstofuhugbúnaðinum sem í þeim var.

Reyndar keyptu frændur mínir Árni og Steinarr, stórlega tölvugeldir menn í dag, magnaða PC tölvu einusinni. Double Dragon eitt og einhver snókerleikur styttu manni stundir þegar maður var í Reykjavík. Það var líka Windows 2.0 eða einhver fjandinn á þeirri vél, gjörsamlega gagnslaust dót.

Sjálfur eignaðist ég svo 286 upp á heil 12MHz með 1MiB af minni. Voðalegur 40MB harður diskur geymdi allt sem geyma þurfti.

En ég man eftir BBC Master, Amstrad CPC, Atari ST og fleiri tölvum miklu fyrr. Eftir á að hyggju voru þær allar betri en þetta PC drasl.