Fyrst bilaði ferðatölvuskjárinn minn, þvínæst aukaskjárinn á aðaltölvunni
og núna nýlega kom ég heim og sá hvergi aðalskjáinn minn heldur bara
stóran þorsk í laginu eins og skjár.
Sá hefur líklega villst á leið sinni til fiskhátíðarinnar sem
var haldin í leyfisleysi í bílskúrnum mínum, séð skjáinn og haldið
að þar væri ferðinni eitthverskonar pastaréttur.
Fyrst ætlaði ég einfaldlega að skera fiskinn upp og taka skjáinn úr honum
en á meðan ég var að brýna slægingarhnífinn minn kynntist ég honum betur og betur.
Í ljós kom að hann hét Xolxar 9 og var konungur þorskanna,
hann sagði mér fallegar sögur af fjarlægum höfum og við fórum í húsdýra og fjölskyldugarðinn.
Á leiðinni heim þaðan mættum við illum veiðimanni sem hafði elt Xolxar um
allan heim og vildi drepa hann því tennurnar hans voru úr gulli og veiðimanninum
langaði að skjóta eitthvað úr gulli.
Eftir 5 ára æsispennandi eltingaleik þvert yfir heiminn á loftbeljum, loftbelgjum og risavélmennum
urðum við loks að sætta okkur við sannleikann, græðgi mannsins veldur því
að fiskar með gulltennur geta ekki lifað meðal okkar.
Tár rann niður vanga minn þegar ég sleppti Xolxar í Hafnarfjarðarhöfn,
við rifjuðum upp allar okkar góðu stundir og þegar hann synti burt
í sólsetrið leit hann við og brosti til mín og blikkaði.
Þetta var fyrir þrem vikum síðan og í kvöld var einmitt fiskur í matinn
heima hjá mér, í fyrsta bita fann ég eitthvað hart uppí mér og gerði ráð
fyrir að það væri bara bein.
Þegar ég skyrpti því útúr mér brá mér heldur betur í brún því þar
var kominn 17" Sony Trinitron CRT tölvuskjár.
Mér leið illa yfir því að hafa borðað vin minn en var ánægður að skjárinn
skilaði sér, ég setti hann í samband og kveikti á tölvunni og viti menn,
hann virkaði fullkomlega en seinna þennan dag fékk ég mér sígarettu hjá skjánum
sem var með opin brúsa af mjög rokgjörnu sprengiefni í vökvaformi við hlið sér.
Skjárinn sprakk í tætlur og andlitið á mér brann af.
En þrátt fyrir þetta allt saman er ég glaður yfir því að hafa hitt Xolxar 9
því það er honum að þakka að í dag á ég risavélmenni, svo ekki sé minnst á loftbeljuna.