“Sko, þannig er mál með vexti… ég hef alltaf verið svona sveimhugi. En núna er eins og þetta sé algjörlega farið úr böndunum. Mér finnst eins og engar hugsanir séu nógu merkilegar til þess ég nenni að fókusera á þær. Ég er bara algjörlega sinnulaus á það sem er í gangi í kollinum á mér hverju sinni.”
- “Ok. Hvernig heldurðu að standi á þessu?”
“Ég eiginlega veit það ekki. Ég fór fyrst að taka eftir þessu fyrir um það bil ári síðan. Ætli það hafi ekki verið um svipað leiti og pabbi dó… jú það var ábyggilega um það bil sko. En ég samt held ekki að því hafi verið um að kenna í rauninni. Þetta hafði staðið fyrir lengi. Hann var búinn að vera lasinn lengi, þú veist. Svo var hann nú ekkert unglamb.”
- “Það er nú varla tilviljun að þú farir að finna fyrir einhverjum doða eftir að pabbi þinn deyr er það?”
“Ég upplifði náttúrulega sorg… ef það er það sem þú ert að meina. En þetta er öðruvísi. Ég er ekki sorgmæddur, ekki glaður, ekki neitt. Ég bara er og bara er alveg sama. Það hreyfir ekkert við mér skilurðu?”
- “Já, ég held það. Líður þér ekkert illa yfir þessu?”
“Ég veit alveg að þetta er ekki eðlilegt, skilurðu? Ég veit að mér ætti ekki að vera sama. Ég veit þetta allt. En ég bara… mér er alveg sama. Það er væntanlega hluti af þessu ástandi, eða hvað þetta nú er.”
- “Þú segir nokkuð. Það var nú einn hjá mér fyrr í dag sem talaði mikið um hvað hann væri alltaf reiður. Satt best að segja held ég að það hljóti nú að vera verra?”
“Eflaust fyrir hann, en kannski ekkert endilega fyrir fólkið í kringum hann. Ég meina, Margrét, konan mín, hún er ekkert sérlega ánægð núna. Hún tekur alveg eftir þessu. Hún sér alveg hvernig ég er hættur að virða hana viðlits… hún veit að eitthvað er að. En þegar ég reyni að útskýra þetta fyrir henni þá trúir hún mér hreinlega ekki. Hún fer ábyggilega að ímynda sér allskyns hluti. Það sem ég meina er að hún er ekki í rónni af því að hún veit ekkert hvað er í gangi, ef maður er reiður þá er maður reiður. Svo má líka taka lyf við því að vera reiður, er það ekki?”
- “Tja, það held ég að gildi nú um flesta hluti. Það eru til lyf við öllu held ég. Hvernig finnst þér þetta?”
“Þetta er fínt. Það er rétt sem þú sagðir, þetta er miklu betra svona stutt hérna í hliðunum.”
- “Já finnst þér það ekki bara? Ég ætla bara að setja smá vax hérna í toppinn og þá er þetta bara komið.”