Já ég er hugsanlega eftilvill kannski að leita mér að bíl. Enn og aftur koma vankantar Akureyrar í ljós. Jú, hér er nóg af ágætum bílasölum og ef maður ætlar að kaupa nýjan bíl þá er um auðugan garð að gresja. Hinsvegar er það svo að ef manni dettur í hug að kaupa sér hundraðþúsund króna fák þá kemur á vondan.

Ég hef nokkrum sinnum keypt druslu í Reykjavík. Þá fer maður í Morgunblaðið, flettir, hringir og kaupir bíl. Hér er ekkert slíkt í gangi. Druslurnar á Akureyri eru ekki til sölu. Það er einn, og ég endurtek einn, bíll á viðráðanlegu verði á bílasölum bæjarins. Það er eðalvagn að nafni Ford, eftir Henry Ford, Escort, eftir dulbúnum gleðikonum á breiðstrætum Sódómu og Gomorru. Bíllinn er ekki mikið keyrður, þannig séð og kostar lítið af peningum. Hann lítur jafnframt vel út að innan sem utan.

Einn flottasti bíll mannkynssögunnar var aðeins smíðaður í einu eintaki. Um er að ræða Cadillac 16 Concept. Hann er eins og úr Tomma og Jenna, þessi endalausi sem glaumgosinn, andstæðingur Tomma um hylli læðunnar, keyrði yfir Tomma á. Tommi var þá á Ford einmitt, eldra módeli, þegar bílarnir hétu eftir bókstöfum en ekki vafasömum neðanjarðarstarfsgreinum. Hér er nú mynd af herlegheitunum:

Það sem er kannski merkilegast við þennan Kadilják er að í honum er svakaleg sextán sílendra vél. Á tímum sparneytni datt hönnuðunum í hug að láta hann keyra bara á fjórum sílendrum þangað til á hinum væri þörf, þá ‘kikka’ þeir inn. Eitthvað svipað er í gangi með Escortinn sem ég er að skoða.

Það eru sumsé ekki allir sílendrarnir virkir í honum.  1-2  starfa þó og geta þeir komið öllum 900 kílóunum af bíl  í 100km/klst á einungis 26 sekúndum, eða aðeins 20 sekúndum hægar en  Ford Focus ST. Á tuttugu sekúndum ætti venjuleg manneskja að geta lesið niður að myndinni af Kadilják. En kallarnir hjá Brimborg ætluðu að kíkja á greyið og gá hvort kertin væru ekki eitthvað… brunnin niður eða eitthvað. Maður hefði nú heldið að þeir myndu nota eitthvað annað en kerti til að kveikja í bensíninu á 21. öldinni!?