Helstu einkenni piparsveins 21. aldarinnar eru í töluverðri andstöðu við einkenni forföður hans á 20. öldinni. Piparsveinninn í dag er hreinlátur, sportlegur og kurteis við kellingar. Til þess að læra a.m.k. tvo af þessum hlutum þá er ég kominn með meistara (hann á reyndar fjögur námskeið eftir til að ná þeirri tign) sem er að vinna í því að breyta mér til betri vegar. Það er ekki síst til að vekja eftirtekt hjá hinu kyninu.

Samskipti mín við hitt kynið eru reyndar ágæt. Þær segja: “Viltu poka?” og ég segi “Já takk, takk kærlega!”. En svo líta þær upp og kasta upp yfir færibandið. Í gegnum matarleifarnar og gallið heyri ég svo greinilegt “Ojjj, öööööö”.

Já, ég er ljótur og ógeðslegur, það leynist engum. Til þess að reyna aðeins að spyrna í við því stakk meistarinn upp á því að ég skellti mér í ræktina til að “verða ægilegur köggull”. Reyndar stakk meistarinn líka upp á því að ég færi í ljós svo ég hætti að “vera svona ógeðslega hvítur”. Ég setti það á ís, ég er ekki tilbúinn fyrir krabbann ennþá.

Nema hvað, ég fór í ræktina og það var bara helvíti gaman. Tók hressilega á því á lóðunum og átti allt eins von á því að vera þó aumari en ég er. Ræktin er ekki eins hryllileg og mig minnti, en hún skilur þó ýmis leiðindi eftir sig. Ég er t.d. að drepast úr strengjum allstaðar.

Eftir að maður var búinn að pumpa sig grimman fékk ég mér skyrbúst á barnum og var nokkuð sáttur. Vel ætur andskoti og þvílíkt seðjandi. Þó þýkir mér allt svona betra þegar ég blanda það sjálfur, sér í lagi ef ég hef gin flösku, spræt og safa af niðursoðnum perum. Ég gerði á mér tvennar mælingar sem ég ætla að deila með ykkur.

Þyngd: 79kg (mun skárra en það var eftir jólin)
Fita: 13,3kg  (mun skárra en það var á Dúmbó áður en hann dó)