Skringilegt fyrirbæri fyrir lífverur að hafa þróað með sér þetta þriðja auga. En þriðja augað nemur, eins og þið vitið, fyrirbæri að handan. Handan við hvað? Við erum ekki með fjórða augað til að sjá ‘vegginn’ eða hvað það svosem er sem er á milli, þannig að þín getgáta er eins góð og mín.

En þriðja augað er ansi magnað verkfæri og hefur kosti sem hin tvö hafa ekki. T.d. er ómögulegt að vera með sjónskekkju á aðeins einu auga og þarf þessvegna ekki að kaupa rándýr gleraugu á þriðja augað þegar andarnir eru komnir úr fókus og svona.

Að sama skapi fylgja líffærinu dularfulla ókostir. T.d. er dýptarskynjun með þriðja auganu ekki upp á marga fiska og því erfitt að stunda ýmsar boltaíþróttir fyrir handan.

En mín venjulegu tvö augu eru eitthvað farin að stríða mér, enda orðinn tuttugu og fimm. Ég á þessvegna pantaðan tíma í sjónmælingu klukkan 14 á föstudaginn. Kannski fæ ég svona glerauga eins og vondi kallinn í Last Action Hero var með!?